الخميس، 26 مارس 2015

المنتدى الثقافي (55)


المنتدى الثقافي (56)

الأم


الأم
                                محمَّد الفاتح يوسف أبوعاقلة
الجنَّة النفوس النَّاس تهوقى عليها
تحت قدميها بالجد إنت بتلاقيـها
هِمُ برُضاها راضيها وأمش قل ليها
غير عَفْوك  جَزَم الدُّنيا ما لي فيـها 
***
ما صبرت كتيـر صبراً ولا بتوصَّف 
وجعا قاسي جد منو الحجـار تتقصَّف
شالت ورضَّعت سهـرت وما بتتأسَّف
تلات مرات ذكرها رسولنا زكَّى وأنصف
***
  أمـك ثم من؟ أمـك.. وأيضـاً أمك    
أبوك الغالـي معلوم إنو أمرو بهمك
ود رضا تبقى إنت بخيت ورايق دمك
قدامك عفو الوالديــن بفيضو بتمك
***
لا تنساها باكر إن بقيت بى عولك
أفكر ليها داعيالك تقيف يا طولك
قول لى أم عيالك ياها كل أصولك
ما تقسيك عليها بتفني كل محصولك
***
كل ما تمشي قدمين أطرى لي تاتايك
وكل ما الليل يجي أذكر زمان لولايك
كيفن كان غداك وياتو ال كان حجايك
ومنو الكان حردت عشاك دوام رضايك
***      
قلبي على جنايا ود حشايا ودخري
عكازة عمايا ونور ضلامي وبدري
سترة حالى في وكت المروة وكبري
    ببذل ليهو شان يسعد حياتي وعمري   
***  
لسانها دوام مَحنَّة وطيـبة ما بتجافي
تدِّيك من ضميرها الخير وقلبها صافي
بى مرضك تهم ..تَنْده  تصيح يا شافي
يوم تكسب رُضاها بتبقى زيَّـك ما في
***